ساووق نفسلریم

سينگه مينينگ،

خاطره مدن اوزگه نرسه قالمه يدي.

كوزلريمده گي ياروغليكني،

بغريگه باسه دي توپراق.

قوللريم قوچاغينگدن ايمس،

قارانغوليكدن توله دي.

قوشلرنينگ قوشيقلري،

تابوتيم اوستيگه ساچيلگن آق كيلينليك كييميم ني،

الوان محزونليككه بوركه يدي.

انه او يوكسكلرده؛

ميندن زياده،

بولوت لر سينگه آچه دي سايه بان،

سينگه سايه قيله دي درخت،

بوغزينگدن ملايم اوته دي نان،

نفسلريمني هيده گن اوشه خانه،

سينگه اتيگي بيرته خاطره دفتري ساوغه قيله دي.

قيد قيلينگن ساووق نفسلريم اونده،

اوتديك يانگن يوره گيمني،

مينينگ عيال حسلريمني،

غريب كوليشلريم سيرّيني،

بيلديره دي بيرته معصوم سوز بيلن:

"كيته من بهاريم، قدريمگه ييتيشينگ اوچون كيته من سيندن."