آنه تیل- ملی غرور

آنه تیل- ملی غرور

«ملی تیلنی یوقاتماق، ملتنینگ روحینی یوقاتماق دیر.» اَولانی

تیل بو- هر بیر ملتنینگ کیملیگی و ملی غروری سنلهدی. بو غرورگه توغری- توزوک پرورش بیریلمسه ییللر دوامیده سینیب، ایزیلیب یوق بولیب کیتیشی هیچ گپ ایمس. معلوماتلرگه کوره؛ ییر یوزیده ۷۰۰۰ دن آرتیق تیل و لهجه موجود بولیب اولردن ۵۰۰تهسیگینه علمی جهتدن تولیق اورگنیلگن. بیراق ۱۴۰۰ ته تیلنینگ عصرلر آقیمیده یوقالیب کیتیش خوفی اوته کینگ دیر.
۱۳۸۲- ییلی توشیح بولگن افغانستان اساسی قانونی نینگ ۱۶- مادهسیده؛ «دری و پشتو تیللری دولتنینگ رسمی تیللری دیر. اوزبیکچه، تورکمنچه، بلوچی، پشهای، نورستانی و پامیری تیللری سوزلاوچیلری یشهیدیگن منطقهلرده دری و پشتو تیللری یانیده مذکور تیللر اوچینچی رسمی تیل اولهراق قبول قیلینیب و اونینگ قندهی یولگه قوییلیشی قانون آرقهلی ترتیبگه سالینهدی»- دیب کورسهتیلگن.
افغانستان اوزبیکلرینینگ تیلی بیر قطار تلویزیون و رادیو همده قنچهدن قنچه انترنت ترماقلری آرقهلی یاش اولاد قولاغیگه ایشیتتیریلمهسین، اونینگ بری بیر مکتب تیلی بولمهگنی بو تیل کیلهجگی اوچونهم، بوگونی اوچونهم کیسکین ضرر آلیب کیلیشی تورگن گپ. آنه تیل بیلن آرهلریده آرهلیق مسافه بولگنی طفیلی، اونده اوقیش و توغری یازیشنی بیلمهگن فرزندلریمیز ییللر آشه اوز آنه تیللری بیلن آش- قتیق بولیب کیتیش اورنیگه یاتلهشیب کیتمسمیکنلر دیگن خوفدن یورهگ تیترهب کیتهدی چاغی.
تینگریگه شکرلر بولسین که آنه تیلیمیز- اوزبیک تیلی ۱۳۹۸ ییلینینگ ۲۹- میزان کونی افغانستان بویلب اوزبیک تیلی ملی کونی صفتیده قبول قیلیندی. رسمی یوسونده قبول قیلینگن مذکور قرار کونی افغانستان اوزبیکلری اوچون شکسیز که قوتلوغ سنه سنلهدی. آنه تیلنی نه فقط مخصوص کونلرده بلکه هر بیر لحظهده ارداقلب، کونگیلده و فکرده تاشیب، حیاتیمیزنینگ باش قهرمانی رولینی بیریب، سوز یوریتیب و اونی ارداقلب یشش کیرهک. آنه تیلده گپیریش کیرهک، اویلش کیرهک، اوقیش و یازیش کیرهکدیر!
افغانستان نینگ چاغداش تاریخیگه نظر سالهدیگن بولسک اوزبیکلر و اوزبیک تیلینینگ آغیر احوالیگه گواه بولهمیز. هر تامانلمه؛ هم سیاسی، همده اجتماعی خورلیکلر و کمسیتیلیشلر اوزبیک تیلی احوالینینگ اوته آغیر کیچیشیگه سبب بولدی.
بیراق اگر تعبیر جایز بولسه اوزبیکنینگ هم باشیگه بخت قوشی قونیب، شور پیشانهسی ینگیدن پارلهی باشلشی بیلن- آق، قطار شعری توپلملر، تحقیقی کتابلر، ترجمه کتابلری و نیچه یوزلب مقالهلر چاپ یوزینی کوریب آنه تیل شیدالریگه تقدیم ایتیلگنی بایهگی گپیمیزنینگ گواهی بولهدی. یوزلرچه یاشنینگ عالیگاهلرده اوزبیکتیلی و ادبیاتی بولیملریده بیلیم آلیشلری و تورلی خیل میدیا و اخبارات واسطهلرینینگ اوزبیک تیلی خذمتلری آرقهلی بیرگن دستورلری خواه ایشیتتیریشلر بولسین، خواه کورستوو بولرنینگ بری اوزون ییللر آقیمیده اولکه بویلب چیتده قالیب کیلگن آنه تیلیمیزنینگ ینه- ده گللب رواجلنیشی اوچون اولکن بولمسه- ده، کیرهکلی حصهسینی قوشیب کیلماقده دیسک خطا قیلمهگن بولهمیز.

#آنه_تیلی_کونی_قوتلوق_سنهدیر!