عیال حقلری توغریسیده بیر- ایکی آغیز سوز

دنیا بویلب عیاللر شرایطلرینینگ خیلمه- خیللیگی، حیاتلری یولیدهگی قیینچیلیکلرنینگ یینگیلراق همده آغیرراقلیگی و کورهشیش یولیدهگی امکانیتلرینینگ قندهی بولیشیدن قطع نظر اولر دایما اوزلرینی حمایه قیلیش حقوقیگه ایگه. عیال حقلری توغریسیده اَیتر ایکنمیز بیر مسلهگه آیدینلیک کیریتیش کیرهک. سککیز مارچ خلقارا خاتین- قیزلر حقوقلری کونی دیر عیاللر کونی ایمس. بو کونده عیال قتلمینینگ انسانی و اینگ بسیط حقّیدن آگاهلنتیریش، کورهشیشنینگ اهمیتینی بیلدیریش و حکومت آدملریدن تارتیب عادی آلامانگچه عیال جنسی (قیزهلاقلر، قیزلر و خاتینلر) حقوقی و تینگلیک مسلهلری توغریسیده قیغوریشلری مقصدگه موافق. بو عموم بشري حق اوچون کورهشیش کونی اینیقسه عیاللرنینگ حقوقلرینی ایسلش و اولرگه دفاع اوچون امکانیت یرهتیش کونی دیر.
بیراق کوزهتیشیمیزچه؛ باسیب اوتیلیشی کوتیلهیاتگن یولدن همان آلیسدهمیز. بونگه عیاللر حقوقلرینی یخشیراق تنآلیب اولرنینگ قیین احوالینی کوزده توتهیاتگن اینگ ایرکین و عیالسیور اولکهلر هم کیرمهیدی.
طالبلر حاکمیتیدن کیین، افغانستانده عیاللر حقوقلری استه- سیکین جانسیز سیلجیشلر بیلن سیاستده تینگلیکنی تامینلشگه، نسبی تینگلیکنی قوللب- قوتلشگه و جنسی زوراوانلیککه قرشی کورهشگه قرهتیلگن کوپلب قانونلر تامانیدن تن آلینگن بولسه- ده، کوپگینه زوراوانلیکلر و تینگسیزلیکلر حلی هم موجود. بوگونگی کونده هم عیاللر اوی ایشلرینینگ کوپ قسمینی بجرهدیلر و هم بالهلر و کیکسه آته- آنهلرگه غمخوارلیک قیلهدیلر. پروفیسیونل دنیاده اولرگه یوکلنگن وظیفهلر کم بهالنهدی. اولر عایلهدهگی زوراوانلیک نینگ هم اساسي قربانلری دیر.
خاتین- قیزلرنینگ حقوقلری انیق انیقلنمهگن: عایلوی تنلاولری، ایشگه کیریش حقی، اوقیش حقی و ینه اونلب حقوقلری بحثلرگه کیرمهی کیلهیاتیر.

درواقع؛ زوراوانلیک دیب بیلینگن هر بیر موردنینگ عیاللریمیز قرشیسیده بارلیگینی اولکهنینگ هر ییریده اوچرهتیش ممکن. عادی عایلهدن تارتیب حتّا رسمی ادارهلرده هم بونی پیقهشینگیز جوده محال ایمس.
اونبیش ییل آلدین افغان عیالی طالبان نینگ افراطی دینی توشونوچهسی و استبدادیدن قوتیلگن بولسه- ده، اوز خاندانی ایرککی نینگ ظلمی آستیده قالیب کیلماقده. اولرگه اوقوو- تعلیم یولی آچیلگن بولسه- ده، ییلکهلریگه ینه ایرکک تمانیدن تعیین بولگن چوکات ایچیدهگینه اوقیشگه کیتیب کیلیش شرطی قوییلماقده. هر قدر هم عیال ایرکینمن دیمهسین ینه هم او ایرکین ایمس. قیسی دیر بیر شکلده او ظلم آستیده، قندهی دیر بیر یوسونده او بردهلیک قیلیب کیلماقده. بو ییرده مین ایرکک قتلمی تمانیدن بروز قیلهیاتگن فیزیکی زوراوانلیکلر حقیده ایمس، روحگه صدمه ییتکزووچی بیر قطار عامللردن سوز یوریتماقدهمن. عیالنی کمسیتیش و خورلهنیشلر کبی نیچه اونلب ظلملر پرده آرتیده قالیب، کورینمهی کیلهیاتیر. نیمه، بولر ظلم ایمس می؟ زوراوانلیک فقط کلتکلش می؟ بو تور سوراقلردن ینه اونتهسینی قطار قیلیش ممکن دیر. سیز، مدنی فعاللر! کلتک و تیاغ آستیده شدت بیلن صدمه کورگن عیالگه یاردم بیریشینگیز یاکه ظالمنی محاکمه قیلیشینگیز ممکن، ایرکککه جزا تعیینلشینگیز ممکن. امّا، ایل کوزیدن یاشیرین قالیب کیلهیاتگن مینگلرچه مورد بارلیگیگه امینمن. روحی ضربهلرنینگ قندهی علاجی بار؟ یاشیرین قالیب کیلهیاتگن میلیونلرچه زوراوانلیکنی قندهی آلدینی آلیش ممکن؟
سیز آنه- آتهلر! فقط مجرمنی عیبلشگه بیل باغلمنگ. قیزلرینگیزنی یخشی کورینگ، مهر بیرینگ، قدر- قیمتلرینی جاییگه قویینگ. اولرنی مستقل بولیب وایهگه ییتیشیلری اوچون هر بیرته قرارلریگه حرمت قویینگ. اورمنگ، سوکمنگ، یخشیلیککه نیمه ییتیسین. اوغیللرینگیزنی عیاللرگه نسبتن مناسبتی اوز عایلهسیده شکللنهدی، کوچهده ایمس. او سیزنی اورنک آلهدی، اونوتمنگ! بونینگ یانیده عایلهنگیزده اولغهیاتگن اوغیل فرزندلرینگیزنی یخشیلب تربیهلشگه بیل باغلهنگ. فکرلرینی ایسکی بولمهغور عنعنهلردن یوویب، تازه فکرگه ایگه بولیب وایهگه ییتیشلری اوچون اوغیللرینگیزگه یخشی کتابلر اوقیتینگ. شونده افغانستان جماعتیده کامل انسان، کامل ایر افسانهسینی حقیقتگه ایلنگنینی کوریشیمیز ممکن، اگر اولمهسک!

+ نوشته شده در ساعت توسط سیاره رحمانی Sayara Rahmani  |